VEHIVAVY AHO

Vehivavy aho fa tsy lehilahy.

Samy hafa ny talenta nomena azy sy ny ahy.

Toa azy, manana ny hasiko aho sy ny zo

Hihary eto amin’ny taniko, hiteny ny hevitro, ho to.

 

Vehivavy aho. Indrisy! Kilema izany mazàna,

Indrindra moa ny fananan’anaka any am-piasana.

Araraotina ahena ny karamako, roahina aho

Fa be erehina, hono, tsy mahavita izao sy izao…

 

Vehivavy aho. Bantina ho fanaka malemy

Ka tsy avela hitantana ombieny ombieny

Mba tsy hahafahako miaro ny hasiko

Raha Adama manampatra ny filany amiko.

 

Vehivavy aho. Reharehako nefa izany.

Izaho no nihavian’ny olona rehetra eto an-tany,

Nikolo, nanabe, nanefy azy ireo ho lehilahy

Mahomby, manan-jara ary manam-panahy.

 

Vehivavy aho. Mila ahy ny firenena,

Ny tokantranoko raha te-hahomby sy hanankarena.

Ka dia hitolona aho ho afaka ny andriambavilanitra

Ho an’ny zanako, ho an’ny taniko, ho voninahitr’Andriamanitra!

 

Domoina, 7 marsa 2007

 

TENA MISY NY FITIA

Adala hono aho
Manaja sy miandry anao,
Satria izaho mino
Fa ianao koa tsy mety manadino
Na lavitra aza ny elanelantany
Dia izaho irery hatrany hatrany
No hany tompon'ny fonao...
Indrisy, adala izao tontolo izao!

Adala izy satria
Tena misy ny fitia
Tsy voasanda, tsy voafetra,
Mandresy ny zava-drehetra,
Ny halavirana, ny fotoana,
Na inona sedra manoloana
Dia mitoetra ho tokana doria
Tsy angano fotsiny ny fitia!

Adala ve ny Ray Tsitoha
Nilaza fa zava-poana avokoa
Ny harena sy fahasoavana
Fa ambony indrindra ny fitiavana?
Tsy adala mihitsy aho,
Sambatra indrindra izaho sy ianao
Mahafantatra sy miaina ny fitia
Maharitra doria doria!

Dia hohaveriko hatrany
Mandra-podiako ho vovontany
Isaky ny manoratra aho
Ho fantatr'izao tontolo izao:
Tena misy ny fitia
Hitoetra mandrakizay doria,
Izy irery no manome ny hasambarana
Tsy manam-pitsaharana...

Domoina Ratovozanany, janoary 2007

HITIA ANAO

Handao izay rehetra mamiko
Hiarahana aminao,
Hanokana ny hoaviko
Hahasambatra anao,

Izay talenta, soa ananako,
Omeko, afoiko daholo !
Ny aiko sy ny fitiavako
Ho anao manontolo…

Na ho mamy na hangidy,
N’inon’inona hanjo ahy,
Hitia anao ry sarobidy,
No voadiko mandrakizay !

Ny foko tia, tena tia,
Nifidy anao ho anjarany.
Hatramin’izao ka ho doria,
Hitia anao hatramin’ny farany…

Domoina Ratovozanany, 2002